Skoliose hos ungdom – fysioterapi etter operasjon

Du får snakke med lege (ortoped), anestesilege, sjukepleiar og fysioterapeut. Fysioterapeuten gir informasjon om korleis du skal forhalde deg til aktivitet under opphaldet på sjukehuset og vidare når du kjem heim.

Du konfererer med kirurgen om du er operert for skoliose og driv toppidrett.

Når du vaknar etter operasjonen, vil du ha ein del utstyr kopla til deg. Dette er heilt normalt, og er til hjelp for deg etter operasjonen. Du kan ligge som du vil, og det er vanleg å veksle mellom rygg- og sideleie dei første dagane. Du vil få hjelp til å snu og flytte deg ved behov, og rettleiing på korleis du kan meistre dette sjølv.

Puste som normalt

Du skal bevege armar og bein for å sikre god blodsirkulasjon. For å hindre lungekomplikasjonar er det viktig å puste så normalt som mogleg. Du vil bli instruert i basal pust, det vil seie djupe innpust (3 x 10 repetisjonar kvar vaken time). Det er viktig at du prøver å hoste opp eventuelt slim, og fysioterapeuten instruerer deg i rett hosteteknikk.

Stå og gå

Vanlegvis kjem du opp og sit på sengekanten allereie kvelden på operasjonsdagen, står og går dagen etter operasjonen, og trener i trapp dag to etter operasjonen. Dei første gongene du er oppe kan du ha behov for støtte (preikestol), men etter kvart vil du ikkje trenge hjelpemiddel. Du skal gå fleire turar dagleg. Du kan gå i trapper, sitte på vanleg stol og toalett.

Etter operasjonen er det vanleg at du kjenner ubehag i samband med at du beveger deg. Dette er heilt normalt, og det er svært viktig at du tør å vere i rørsle for å forhindre komplikasjonar og vinne tilbake normal funksjon så raskt som mogleg.

Balanse og haldning

Etter operasjonen kan du oppleve at du har eit annleis tyngdepunkt enn før. Du bør derfor jobbe med bevisstgjering av balanse og haldning, gjerne ved hjelp av ein stor spegel. Fysioterapeuten vil instruere deg i dette.

Dei fleste blir på sjukehuset i 3–4 dagar etter operasjonen. Du kan reise heim i bil, buss eller med rutefly, avhengig av kor i landet du kjem frå.

Ryggen din toler vanleg dagleg aktivitet, men du skal unngå kontaktidrett og/eller aktivitetar med fare for fall, harde støyt og vibrasjonar i 6 månader. Frå sjukehuset får du med deg ei erklæring om fritak frå gymnastikk på skolen dei første 3 månadene etter operasjonen, og deretter at du må ha tilrettelagt gymnastikk dei neste 3 månadene etter det igjen.

Driv du toppidrett må du konferere med legane som opererte deg, om kva du toler.

Bruk av ergometersykkel, turgåing og svømming er forslag til aktivitetar du kan gjere etter operasjonen. Fysioterapeuten på sjukehuset vil instruere deg i enkle øvingar som du kan gjere dagleg etter at du har komme heim frå sjukehuset.

Jogging blir tillate etter 6 veker. Svømming kan du begynne med så snart såret er grodd, cirka 3 veker etter operasjonen. Fysioterapi etter utskriving frå sjukehuset blir vurdert etter behov. Normalt tar det cirka 6–9 månader før ryggen er heila.

Bilkøyring er tillate, både som passasjer og sjåfør. Du kan begynner å køyre sjølv når du sluttar å bruke sterke smertestillande medisinar (og om du har sertifikat!).

Kontroll

Du kjem til kontroll hos fysioterapeut 3 månader etter operasjon, og hos lege 6 og 12 månader etter operasjon. På kontrollane får du høve til å ta opp spørsmål om vidare retningslinjer utover det som er skissert her.

Skole

Du kan begynne på skolen 1–3 veker etter heimkomst, eller så fort forma tillèt det. Om du går i grunnskolen, kan du få heimeundervisning i mellomtida. Du vil også ved behov få dekt drosjetransport til/frå skolen i cirka 3 månader. Det blir anbefalt to sett med skolebøker. Blir du sliten av å vere på skolen heile dagen, bør du ha høve til å legge deg ned og kvile, eventuelt starte med redusert skoledag.

Nokon blir på sjukehuset i så lang tid at det går ut over skolegangen. For ungdom i skolealder er det viktig å sjekke ut tilbodet om lokal sjukehusskole for å unngå unødig fråvær.