Skoliose hos ungdom – korsettbehandling

Dersom skoliosen utviklar seg til mellom 20 og 25 grader skeivskap (progredierer til >20–25 grader), betyr det at korsettbehandling er aktuelt. Føresetnaden er at ungdommen framleis er i vekst. Kor mykje ungdommen kjem til å vekse vidare, vurderer vi ved å ta røntgen av skjelettet i handa.

Vi oppfordrar til å leve familie- og kvardagslivet så normalt som mogleg i ventetida fram til tilvisinga er behandla og pasienten har fått time til vurdering og behandling på sjukehuset.

Ungdommen møter opp til avtalt time på Oslo universitetssjukehus, Rikshospitalet. Avhengig av størrelse på skeivskapen og gjenverande vekst vurderer vi kva type korsett som skal brukast. Oslo universitetssjukehus samarbeider med Sophies Minde Ortopedi. Tilpassing og justering av korsettet skjer hos Sophies Minde på Bryn.

Det blir sett av tre–fire dagar for tilpassing av korsettet. Undervegs i opphaldet får ungdommen møte lege, ortopediingeniør og fysioterapeut. Målet er at ungdommen skal få informasjon om kvifor ein må bruke korsett, og korleis ein skal bruke det, korleis ungdommen skal halde seg i fysisk aktivitet og generelle tips og råd. Ungdommen lærer seg å ta det av og på og å sove med korsett.

Kjem de langvegs frå får ungdommen overnatte saman med forelder eller verje på pasienthotellet.

Heiltidskorsett skal brukast 23–24 timar i døgnet. Nattkorsett blir berre brukt om natta, 8–10 timar kvar natt. Det kan vere lurt å informere nokon venner som kan hjelpe til med å ta korsettet av/på. Mange opplever det også som nyttig å informere klassen sin om korsettbruk.

Ortopediingeniør instruerer i korleis ein gradvis skal klare å stramme korsettet meir og meir. Det er vanleg at korsettet er litt ubehageleg i starten til ein er vand med å bruke det, og nokon opplever ubehag etter måltid. Ubehag er vanlegast i den første perioden etter oppstart med korsett.

Mange bruker korsett opp til 16–18-årsalderen, og for jenter er det vanleg å bruke korsett 1,5 til 2 år etter første menstruasjon.

Ungdommen må vanlegvis til regelmessige røntgenundersøkingar og kontroll. Det er vanleg med kontroll hos lege med røntgenundersøking kvar 6. månad. I forkant av kontrollane er det viktig at ungdommen tar korsettet sitt av kvelden før og søv utan slik at ryggskeivskapen kan målast rett utan korsett.

Fysioterapeuten oppfordrar til å halde fram med fysisk aktivitet. Held ungdommen på med ein organisert idrett, kan ein gjerne halde fram med dette. Ungdommen blir oppfordra til å delta i gymnastikk på skolen. Om korsettet er til hinder for aktiviteten, kan det takast av under aktiviteten. Fysioterapeuten kan tilpasse eigentreningsøvingar. Ved behov kan lokal fysioterapeut kontaktast for oppfølging.

Skole

Nokon blir på sjukehuset i så lang tid at det går ut over skolegangen. For ungdom i skolealder er det viktig å sjekke ut tilbodet om lokal sjukehusskole for å unngå unødig fråvær.